სიახლეების გამოწერა

სოფელ გომარეთში სახალხო დღესასწაული „გომარეთობა 2026“ გაიმართა

დღესასწაული საზეიმო წირვით დაიწყო, რის შემდეგაც აქტივობებმა სოფლის ცენტრში გადაინაცვლა.

ღონისძიების ფარგლებში, სოფლის ცენტრალურ სკვერში მოეწყო ეთნოგრაფიული კუთხე, სადაც ხალხური რეწვის ნიმუშები, ხეზე ნაკვეთი ნამუშევრები და ფერწერული ტილოები გამოიფინა. სტუმრებისთვის წარმოდგენილი იყო სადეგუსტაციო სუფრა, ჩატარდა ტრადიციული კერძების მომზადების მასტერკლასები და გაიმართა ადგილობრივი, ტრადიციული გასართობი თამაშები.

განსაკუთრებული ადგილი დაეთმო სპორტულ აქტივობებს. ჩატარდა შეჯიბრებები დოღში, ჭადრაკში, მკლავჭიდსა და ქართულ ჭიდაობაში, რის შემდეგაც საზეიმოდ დაჯილდოვდნენ გამარჯვებული სპორტსმენები და „საპატიო გომარეთელები“.

ადგილობრივ მოსახლეობას დღესასწაული მიულოცეს ქვემო ქართლში სახელმწიფო რწმუნებულის პირველ მოადგილემ, იოსებ ალიბეგაშვილმა, მოადგილემ ავთანდილ ჭრიკიშვილმა, ბოლნისის, დმანისის, თეთრიწყაროსა და წალკის დელეგატმა დავით შერაზადიშვილმა, დმანისის მუნიციპალიტეტის მერმა კობა მურადაშვილმა, საკრებულოს თავმჯდომარემ პაატა ყულიაშვილმა და სასულიერო პირებმა.

ღონისძიება საზეიმო კონცერტით დასრულდა, რომელშიც მონაწილეობა ადგილობრივმა შემოქმედებითმა ჯგუფებმა და მოწვეულმა შემსრულებლებმა მიიღეს.